Амбасада на Република Северна Македонија во Јапонија

Најнови вести

Средба Османи - Сузуки

Министерот за надворешни работи, Бујар Османи, за време на посетата на Јапонија, оствари средба  со државниот министер за надворешни работи, Сузуки Такако . Во фокусот на разговорите беа билатералните односи меѓу Северна Македонија и Јапонија, што беа оценети како исклучително блиски и пријателски. Османи изрази благодарност за целокупната јапонска помош преку различни донации, грантови  и проекти, што го поттикнува нашиот економски и социјален развој. На средбата стана збор и за потенцијалот за зајакнување на економската и бизнис соработка, при што беше поздравено идното учество на Северна Македонија на Осака ЕКСПО 2025, како и одржаната бизнис презентација од страна на Османи на бизнис форумот во Јапонската организација за меѓународна трговија (ЏЕТРО).  Воедно, беше упатена заедничка осуда за руската воена инвазија во Украина, што претставува закана не само за мирот и стабилноста на европскиот континент, туку го таргетира и Индо – Пацификот и целокупната меѓународна безбедносна архитектура. Покрај билатералните односи, кои беа оценети како многу добри и со постојан нагорен тренд, се разговараше за соработката на мултилатерален план и за меѓусебната поддршка за кандидатури во меѓународни организации.  Соговорниците меѓусебно се информираа и за состојбите во Индо-Пацифичкиот регион, како и за актуелните состојби во Западен Балкан. Притоа, беше нагласена јапонската поддршка за евроинтегративните процеси на Северна Македонија, што е особено значајно за зачувување на стабилноста во земјата и регионот. Османи од своја страна изрази поддршка за јапонските заложби за слободен и отворен Индо – Пацифик, истовремено упатувајќи силна порака дека меѓународното статус кво во споменатиот регион не смее да се менува еднострано и со употреба на сила. Османи од Токио заминува во посета на Вашингтон каде ќе ја предводи владината делегација во рамките на Стратешкиот дијалог меѓу Северна Македонија и САД.  

Toкио, 31 мај 2022 г.

Парламентарната дипломатија клучна за зајакнување на билатералните односи

Министерот за надворешни работи, Бујар Османи, во рамки на работната посета на Јапонија, оствари одвоени средби со спикерот на Домот на претставници, Хиројуки Хосода и претседателката на Домот на советници, Санто Акико. На средбите, соговорниците се осврнаа на односите меѓу Северна Македонија и Јапонија, при што акцентот беше ставен на меѓу парламентарната соработка. Беше констатирано дека постои голем потенцијал за продлабочување на врските меѓу двата законодавни дома, особено преку постоечките пратенички групи за соработка во двете земји. Воедно, на средбите стана збор и за економската соработка меѓу двете земји и можностите за унапредување на бизнис релациите, особено во делот на привлекување јапонски инвестициите. Претседателите и на двата дома изразија силна поддршка за европските интеграции на Северна Македонија, што претставува значаен предуслов за напредокот на земјата, но и за севкупната стабилност на Западниот Балкан. Соговорниците разменија мислења и за актуелната безбедносна состојба по руската инвазија во Украина, како и нејзиното влијание врз стабилноста во Европа и Индо – Пацификот.    

Toкио, 31 мај 2022 г.

Османи на средба со престолонаследникот Акишино и принцезата Акишино

Министерот за надворешни работи, Бујар Османи, денес, во рамки на работната посета на Јапонија се сретна и со престолонаследникот Акишино и принцезата Акишино. На средбата, министерот Османи изрази задоволство од односите меѓу двете земји, особено во делот на културната соработка. Го поздрави делото на Кензо Танге како точка на обединување и симбол на пријателството меѓу двете земји, како и годинешното доделување на наградата “Златен венец” на јапонскиот поет, Шунтаро Таникава, во рамки на Струшките вечери на поезијата. Потоа, министерот Османи оствари средба со претседателот на Парламентарната група за соработка меѓу Северна Македонија и Јапонија, Шинџи Иноуе и други членови на групата. На средбата стана збор за теми од билатералните односи меѓу двете земји, можностите за унапредување на соработката особено во делот на економијата и бизнисот, современите безбедносни предизвици и нивното влијание врз европскиот континент и Индо – Пацификот.  

Toкио, 30 мај 2022 г.

Туристички дестинации

Манастир Јован Бигорски

Шарена Џамија, Тетово

Залив на Коските, Охрид